पत्रकारिता समाजको ऐना हो वडा अध्यक्ष घर्ती मगर
गलकोट साउन ७ गते
गलकोट नगरपालिका वडा नं १० का वडा अध्यक्ष तिलक घर्ती मगरले पत्रकारिता समाजको ऐना भएको बताउनु भएको छ । पाण्डवखानी अनलाईन खबरले आयोजना गरेको एक हप्ते निशुल्क रेडियो उदघोषण तथा पत्रकारिता तालिमको समापन समारोहलाई सम्बोधन गर्दै वडा अध्यक्ष घर्तीले यस्तो बताउनु भयो । ग्रामीण क्षेत्रमा पत्रकारीताको विकास गर्दै त्यसको महत्व, यहाँका समाचार सामग्री विश्व सामु पुराउन यो तालिमको महत्व रहने उहाँको भनाई छ । अध्यक्ष घर्तीले तालिममा सहजीकरण गर्ने प्रशिक्षक, आयोजक संस्था र सहभागीहरुलाई धन्यवाद समेत ज्ञापन गर्नुभयो । सो अवसरमा तालिमका प्रशिक्षकहरु नेपाल पत्रकार महासंघ गण्डकी प्रदेश पार्शद थम्मन थापा सन्देश, पर्यटन पत्रकार संघ गुल्मीका अध्यक्ष कौरव खत्री, वडा सदस्य राम बहादुर विकलाई मायाको चिनो प्रशंसा पत्र सहित सम्मान गरिएको थियो । तालिममा पाण्डवखानी र आसपासबाट २२ जनाको सहभागिता रहेको थियो । तालिम सञ्चालनको लागि पाण्डवखानी समाज युकेले नगद रु ३१ हजार आर्थिक सहयोग प्रदान गरेको थियो । कार्यक्रममा पुर्व सांसद नर बहादुर पुन निरज, नेपाल पत्रकार महासंघ गण्डकी प्रदेश पार्शद थम्मन थापा, वडा सदस्य राम बहादुर विक, पाण्डवखानी माध्यमिक विद्यालयका व्यवस्थापन समितिका अध्यक्ष मानसिंह छन्त्यालले शुभकामना मन्तव्य राख्नु भएको थियो । त्यस्तै प्रशिक्षार्थी हरि विक, साजन विक र विपिन दर्जीले तालिमले आफुहरुलाई आत्मबल बढेको, पत्रकारिता तर्फ आकर्षण गरेको र क्षमता अभिवृद्वि गर्न सहयोग पुगेको धारणा राख्नुभएको थियो । तालिम अवधिभर पत्रकारिताको मुल्य मान्यता र कार्य विधी, उदघोषण कला, फिचर न्यूज लेखन, अनलाईन पत्रकारिता, अन्तरवार्ता, समाचार लेखन, पत्रकारका काम कर्तव्य र अधिकार, पत्रकार आचार संहिता लगायतका विषयमा सहजीकरण गरिएको तालिम संयोजक सुरेश छन्त्यालले जानकारी दिनुभयो । गलकोट नगरपालिका वडा नं १० पाण्डवखानीमा आयोजित पत्रकारिता तालिमको समापन समारोह पाण्डवखानी अनलाईन खबर सञ्चालन समितिका अध्यक्ष देवराज पुनको अध्यक्षता, प्रशिक्षार्थी भिमा श्रीसको स्वागत मन्तव्य र अनलाईन सह सम्पादक दिप घर्तीको सञ्चालनमा सम्पन्न भएको थियो ।
